Adil benasser - 01- sahra bladi الصحرا بلادي

- من ديوان " من قاع لخابية " -

واشْ الظلمْ يا عالمْ فيكْ عادَة
والناسْ جوجْ إمَّا عبيـدْ إما سادَة
والدنْيا لهبيلَة مسْكينَة زايدَة
سايقْها لهْبالْ وغادة .. غادة غادَة
نحلمْ بيكْ يا بلادي عروسَــة
فيـكْ ضوْ لفرحْ والطيورْ غرادَة
يطولْ ليلي بهْـمُومو وهْمومي
ولازمْ ما يصبحْ الصباحْ بسعـادَة
ولّيتْ عليكْ يا بلادي غريـبْ
أمْ فهْمي قلْ تلفْ ولاَّ غيـرْ لْعـادَة
نشوفْ فيـــكْ الظلمْ يطوفْ
وْ حْبابي هْلْ بْلادي عيـونْ سدَّادَة
رْزقْ لعبادْ محكـــومْ بقَبْضَة حديدْ
وْناسْ تصْفقْ فْرْحَانة خْدادَة
زْرابي مفْروشَة وسَيـَّاراتْ تْشَالي
أموالْ ما تحْسْبها مْخاخْ عدَّادَة
تكَلبَّتْ حْوالكْ ليلكْ مهدودْ تْعْبانْ
ونْهاركْ سيـــبَا وفَوْضى مَدَّادَة
حْوالكْ عيــــَّاتْ دْوّيْتي وْقْلامي
وْوْراقي عْليكْ بْالنّـــواحْ عْدَّادَة
سْكْنَتْ لحْزانْ فْقَـــــاعْ لبْيَارْ
ورْمالكْ عطْشانَة " بْكْدَاشْ زَادَة "
نْسا ورْجالْ طْفــــالْ وصْبْيانْ
قْصايدْ المحْرومْ صامْدَة صْمَّـادَة
تْكتَبْ بْلعَزْ وْلفْخرْ غْنـَّــــايَةْ
موتْ عْلى بْلادي يْتْكرمْ بْشْهـادَة
يمْوتْ صْبـــَـايَ وْشْيبي يْوْقفْ
ورْمـــالْ الذْهَبْ هَامْدَة خْمَّادَة
تْعْياوْ ما تْقْتْلـــو وْ تْبْقى بْلادي
فعْروقْها مْرَة حَـادْكة فحْلة وَلَّادَة
الصَّحْرَا بْلاَدِي مَهْما قَالْ لْعْدُو
مهْما كْذَبْ وْكْذْوبو فاتْ حْدَادَة
- 2011-
مع خاص تحيات
عادل بناصر
فرنسا 85000