Adil benasser - 09 - khalakhal al ham خلاخل الهم

في الذكرى 11 للرحيل الشاعر يكمل المناجاة بالدمع بدل الحبر:

خْلَاخْـــــــــــــــــــــــــــــــلْ الهمْ

شحالْ هزْ لخاطرْ وْ عيتْ .. عِيتْ نْكَابْرْ
لْغْرْبَة وَحْشْ كَاسْرْ .. هَمْ وْ شْحَالْ ضَاسْرْ
مْنْ بحالي الموتْ عَاشْرْ .. وْعَايْشْ صَابرْ
كْبْدَة فمكانْ وْ قْليبْ غَابرْ .. عَايْشْ مْغَامرْ
صَابْر آ قلْبي صَابرْ .. صَابرْ وْ زيدْ صَابرْ
غَايْبْ وْ حَاضْرْ .. عَامرْ يَا قْليبْ عَامرْ
هَازْ وْ مَ قَادرْ .. نمْشي وْ نزيدْ نكَابرْ
بينْ العَايْشينْ نموتْ .. بينْ مَاضِي وْ حَاضْرْ
حُبّي فَاتْ الفُوتْ .. بْالحُبّْ قْليبي عَامْرْ
قْوَافي لاَبْسَة خْلاخْلْ .. تْجرْ الزّْهَرْ تْقَاطْرْ
فْ الصُوفْ تْرَّشْ تْغَازْلْ .. منْ فجرْ لْعَاصْرْ
صْبْ آ قْليبي الَّدمْعْ .. وْ شْكي هَمّْكْ للْقَادْرْ
النَّاسْ محَالْ تْسْمَعْ .. قَادْرْ يا رَبّي قَادْرْ
يَا قْليبْ بْدَمّي كْتْبْ هَمّي .. نْهارْ وْ ليلْ سَاهْرْ
في ضيمي ضْرَبْتْ طَمّي .. دَمْعي عْنيدْ قَاهْرْ
أنَا فِيهْ نْهَاوْدْ .. وْ هوَ يْزيدْ يْكَابرْ
نحْبسْ وْ نْعَاوْدْ .. يْهْمَدْ وْ يْنْزَلْ خَاثْرْ
سْكَنْ مْنّي الخَاطْرْ .. بْعَيْني وْليتْ مْغَامْرْ
هجْرَتْ الخَالْ وْ الخُلْخَالْ .. وْ حْسَبْتْ رُوحي مْسَافْرْ
هْجَرْتْ عَلى ليفْ وْ دَالْ .. دْمْعي فْعَيني قْنَاطْرْ
حَازْمْ وْ عْليهْ صَابْرْ .. وْ قْلْبي رْهِيفْ مَا قَادْرْ
سْنينْ وْ شْحَالْ صَابْرْ .. وْ هَوَاكْ فْنَفْسي يْحَاصْرْ
رْبيعْ وْ صِيفْ .. شْتَا وْ خْريفْ
قْليبي فْ الشُوقْ يْعَافْرْ .. عَايْشْ مْعَاقْرْ
هَذا الحُبّْ مَا زَالْ .. شْفَايَ مْنَّكْ مُحَالْ
شْحَالْ جْهْدي فْ صْبَرْ شْحَالْ ..
شْحالْ هَزْ لخَاطْرْ وْ عِيتْ .. عِيتْ نْكَابْرْ
لْغْرْبَة وَحْشْ كَاسْرْ .. هَمْ وْ شْحَالْ ضَاسْرْ

عادل بناصر
الاثنان 16/09/2013 ( فرنسا 85000- الساعة 03:20 - )